25.06.2014. – Resultatet i uravrøystinga i Utdanningsforbundet viser at KS sin skulestrategi har havarert. KS har ikkje klart å forvalte arbeidsgjevaransvaret dei fekk i 2003 på ein truverdig måte, seier Unio-leiar Anders Folkestad i ein kommentar til at heile 73 prosent av lærarane har stemt nei til tariffavtalen.

Det er særleg arbeidstidsavtalen som utløyste det klare nei-et blant medlemmene i Utdanningsforbundet.

– Forslaget til arbeidstidsavtale blei av lærarane oppfatta som ein provokasjon og eit symbol på detaljstyring og fagleg degradering, slår Folkestad fast.

Han meiner situasjonen for norsk skule no er så alvorleg at politikarane ikkje lengre kan lukke auga.

– Dette er, som eg kan hugse, den skarpaste og klaraste uravrøystinga i norsk arbeidsliv i nyare tid. KS og kommunane må no revidere sin eigen politikk og strategi, og kursen må leggjast om. Her har tydelegvis og dei politiske partia ein jobb å gjere, meiner Unio-leiaren.

– Det er Utdanningsforbundet som er i streik, men som hovudorganisasjon vil Unio sjølvsagt følgje opp og støtte når våre medlemmar er i kamp, presiserer Folkestad.